第五十九回　攫文书借用连环计　挣名气央题和韵诗

按：一日午后，黄二姐到了黄翠凤家，将欲噪闹。黄翠凤令外场喊两把皮篷车，竟和罗子富作明园之游，丢下黄二姐坐在房间里，任其所为。

及至明园泡下茶，翠凤还是冷笑道：“赎身文书来浪我手里，看俚再有啥法子！”子富道：“耐该应教个大姐陪陪俚。”翠凤头颈一扭道：“等俚歇末哉，啥人去陪俚嗄。”子富道：“勿局个囗。”翠凤道：“啥勿局，阿伯俚偷仔倪个家生？”子富道：“俚家生末勿要，赎身文书晓得来哚皮箱里，俚阿要偷嗄？”一句提醒了翠凤，登时白瞪瞪两只眼，失声道：“阿哟，勿好哉！”赵家(女每)在傍也是一怔，道：“划一勿好囗，倪快点转去罢。”

子富欲令翠凤先行，翠凤道：“耐末生来一淘转去，倘忙拨俚偷仔去末，也好替我商量商量。”当下三人各坐原车赶回家中。

一进家门，翠凤先问：“无(女每)阿来里楼浪？”外场回说：“刚刚转去，勿多一歇。”翠凤三脚两步，奔到楼上房间里。看看陈设器皿，并未缺少一件；再往床背后打一看时，这一惊非同小可。翠凤跺脚嚷道：“难末勿好哉呀！”

子富随后奔到，只见皮箱铰链丢落地上。揭开盖来，箱内清清爽爽只有一只拜盒。翠凤急的只是跺脚，又哭又骂，欲向黄二姐拼命。子富与赵家(女每)且劝翠凤坐下，慢慢商量。翠凤道：“商量啥嗄，俚是要我个命呀！我就死仔，难末俚有仔好处哉！”子富道：“耐末先拿我个拜区放好仔再说。”翠凤复从皮箱中取那只拜匣，别处收藏，忽然失惊打怪的喊道：“咿，倪只拜匣来里（口宛）！”既而恍然大悟道：“噢，俚拿差哉，拿仔罗老爷个拜匣去哉！”说着，呵呵大笑。子富听说，慌问：“我只拜匣阿来里嗄？”翠凤捧出那只拜匣给子富看，嘻嘻笑道：“俚拿差哉，拿仔耐个拜匣。倪拜匣末倒来里。”子富面色如土，拍腿说道：“难末真真勿好哉！”翠凤道：“耐只拜匣勿要紧个，俚拿得去也无啥用常阿敢去变洋钱，俚也无拨场花好变（口宛）。”

子富呆想不语。翠凤乃叫赵家(女每)吩咐道：“耐去搭无(女每)说，该只是罗老爷个拜匣，问俚拿得去做啥？故歇罗老爷等来浪要哉，原教俚拿得来。”赵家(女每)答应而去。子富终有些忐忑惶惑。翠凤却决定黄二姐断无扣留不放之理。

一会儿，赵家(女每)回来，见了子富，先拍着掌笑一阵，然后复道：“故末笑话，俚哚还勿曾觉著拿差个呀，倒快活煞。我说是罗老爷个拜盒，难末刚刚晓得仔，呆脱哉，一声闲话响勿出。我末笑得来！俚哚教我带转去，我说‘勿管’就走。”子富跌足道：“嗳，耐为啥勿带仔来嗄？”赵家(女每)道：“俚哚拿得去个末，让俚哚自家拿得来。”翠凤接口道：“勿要紧个，晚歇定归来。”

子富像热锅上蚂蚁一般，坐不定，立不定，着急得紧。翠凤见子富着急，欲令赵家(女每)去催。子富止住，把高升唤至当面，令向黄二姐索取拜盒，并道：“耐闲话（要勿）去多说，就说我有事体，要用着个拜盒，快点拿得来带转去。”

高升领命，径往尚仁里黄二姐家。黄二姐见是高升，满面堆笑，请去后面小房间。高升日致主人之言，立等要那拜盒。黄二姐道：“拜盒来里呀，我要搭罗老爷说句闲话。耐（要勿）要紧，请坐囗。”高升不得已坐下。黄二姐喊人泡茶，从容说道：“耐来得正好。我有多花闲话来里，拜托耐去说拨罗老爷听。先起头翠凤来里做讨人，生意闹猛得野哚；为仔倪搭开消大，一径无拨多洋钱。翠凤赎仔个身末，勿好哉，生意一点也无拨，开消倒省匆来。一千洋钱个身价，勿知勿党才用完，难末无法子哉（口宛）！原来搭个翠凤商量，借几百洋钱用用，陆里晓得个翠凤定归勿借；跑仔好几埭，俚倒定归回报我无拨。我想耐翠凤小个辰光，梳头缠脚才是我，出理耐到故歇，总当耐是亲生囡仵，耐倒实概无良心！我第一转开口，耐就一点情面才无拨，故末气得来要死。今朝我也匆说哉，有心要拿俚个赎身文书难难俚。拿着仔俚赎身文书末，喊俚转来，原搭我做生意。俚倘然再要赎身末，定归要一万洋钱哚。再勿靠帐拿差仔，勿是个赎身文书，倒拿仔罗老爷个拜匣。罗老爷是再要好也无拨，生意浪末照应仔倪几几花花，就是小个场花也幸亏罗老爷十块廿块借拨我用。我匆像是翠凤个无良心，时常来里牵记个罗老爷。坎坎晓得是罗老爷个拜匣，我就忙煞个要送得来。不过我再来里想，翠凤搭仔罗老爷赛过是一个人，罗老爷个拜匣赛过是翠凤个拜匣。我末气匆过个翠凤，要借罗老爷个拜匣押来里，教翠凤拿一万洋钱来赎得去。等翠凤一万洋钱拿仔来，我就拿拜匣送还拨罗老爷。耐转去搭罗老爷说，教罗老爷放心末哉。”

高升听这一席话，吐吐舌头，不敢擅下一语，回至兆富里，一五一十细细说了。翠凤听至一半，直跳起来，嚷道：“啥个闲话嗄，放屁也匆实概放个（口宛）！”子富也气得手足发抖，瘫在榻床，说不出半句话。翠凤呆了一呆，欻地站起身来，说声“我去”，就要下楼。子富一把拉住，问：“耐去做啥？”翠凤道：“我要去问声俚：阿是要我个命！”子富连忙横身拦劝道：“耐慢点囗！耐去无啥好闲话。我去罢，看俚阿好意思说啥！就依俚末，也不过借几百洋钱末哉。”翠凤咬牙切齿恨道：“耐要气杀我哉，再要拨洋钱俚！”

子富即喊高升，打轿前去。小阿宝迎着，请至楼上先时翠凤住的房间。黄金凤、黄珠凤同声叫“姐夫”，并说：“姐夫长远勿来裁。”子富问：“耐无(女每)囗？”小阿宝说：“来浪来哉。”

道声未了，黄二姐已笑吟吟掀帘进房，踅到子富面前，即扑翻身磕了个头，口中说道：“罗老爷（要勿）动气，我搭罗老爷磕个头，种种对勿住罗老爷。罗老爷个拜匣末，就该搭放两日，同放来哚翠凤搭一样个呀。罗老爷一径搭倪要好煞，倪阿敢糟蹋仔拜匣里个要紧物事，难为罗老爷？耐罗老爷索性（要勿）管，勿怕翠凤勿赎得去。等翠凤发极仔，自家奔得来寻我，难末好说闲话哉。翠凤个人匆到发极辰光，陆里肯爽爽气气拿一万洋钱来拨我。”

子富听其一派胡言，着实生气，且忍耐问道：“耐瞎说末（要勿说说，终究要借俚几花，说拨我听听看。”黄二姐笑道：“罗老爷，我匆是瞎说呀。起初不过借几百洋钱，故歇倒勿是几百洋钱个闲话哉。翠凤无良心，难下去再要无拨仔洋钱，翠凤生来勿借拨我，我也无啥面孔再去搭翠凤借。难得故欧有罗老爷个拜匣来里末，定归要敲俚一敲哉！一万例勿曾多囗。前日天，汤老爷拿得来房契阿是也有一万哚？”子富道：“价末耐来浪敲我哉，勿是为翠凤！”黄二姐忙道：“罗老爷勿是呀，翠凤陆里有一万洋钱？生来搭罗老爷借。罗老爷一节个局帐有一千多吸，勿消三年，就局帐浪扣清仔好哉。罗老爷阿对？”

子富无可回答，冷笑两声，迈步便走。黄二姐一路送出来，又说道：“难末种种对勿住罗老爷，总归是无拨生意个勿好，用完仔洋钱无法子。横竖要饿杀末，阿伯啥难为情嗄？倘然翠凤再要搭我两个强，索性一把火烧光仔歇作，看俚阿对得住罗老爷！”

子富装做不听见，坐轿而回。翠凤迎问如何。子富唉声叹气，只是摇头。问的急了，子富才略述大概。翠凤暴跳如雷，抢得一把剪刀在毛一定要死在黄二姐面前。子富没得主意，听其自去。

翠凤跑至楼下，偏生撞见赵家(女每)，夺下剪刀，且劝且拦，仍把翠凤抱上了楼。翠凤犹自挣扎道：“我总归要死个哉呀，为啥一班人才要帮俚吸，勿许我去嗄？”赵家(女每)按定在高椅上，婉言道：“大先生，耐死也无行用（口宛）。耐末就算死哉，俚叹也拚仔死末，真真拿只拜匣一把火烧光仔，难罗老爷吃个亏常恐要几万哚囗。”子富听说，只得也去阻止翠凤。翠凤连晚饭也不吃，气的睡了。

子富气了一夜，睁睁的睡不着。清早起来，即往中和里朱公馆寻着汤啸庵，商议这事如何办法。啸庵道：“翠凤赎身不过一千洋钱，故歇倒要借一万，故是明明白白拆耐个梢。若使经官动府，倒也不妥。一则自家先有狎妓差处；二则抄不出赃证，何以坐实其罪？三则防其烧毁灭迹，一味混赖。一拜匣个公私文书，再要补完全，不特费用浩繁，且恐纠缠棘手。”子富寻思没法，因托汤啸庵居间打话，啸庵应诺。

子富遂赴局理事，直至傍晚公毕，方到了兆富里黄翠凤家。下轿进门，只见文君王正在客堂里闲坐，特地叫声“罗老爷”。子富停步，含笑点头。君玉道：“罗老爷阿看见新闻纸？”子富大惊失色，急问：“新闻纸浪说啥嗄？”君玉道：“说是客人个朋友，名字叫个啥……噜苏得野哚！”说着又想。子富道：“名字（要勿）想哉，客人朋友末啥个事体？”君玉道：“无啥事体，做仔两首诗送拨我，说是上来哚新闻纸浪。”子富“嗑”的笑道：“倪勿懂个。”更不回头，直上楼去。

文君玉不好意思，别转脸来向个相帮说道：“我刚刚搭耐说上海个俗人，就像仔罗老爷末也有点俗气。拗空算客人，连搭仔做诗才匆懂，也好哉！”相帮道：“难末拌明白哉，耐说上海客人才是熟人，我倒一吓。耐生意海外得来，故是成日成夜，出来进去，忙煞哉（口宛），大门槛阿要踏坏嗄。陆里晓得陌生人耐也说是熟人。”君王道：“耐末瞎缠哉囗。我说个俗人勿是呀，要会做仔诗末就匆俗哉。”相帮道：“先生耐（要勿）说，上海丝茶是大生意。过仔垃圾桥，几花湖丝栈，才是做丝生意个好客人，耐熟仔末晓得哉。”

君王又笑又叹，再要说话，只听相帮道：“难末真个熟人来哉。”君玉抬头一看，原来是方蓬壶，即诉说道：“俚哚喊耐俗人，阿要讨气？”蓬壶踅进右首书房，说道：“讨气倒勿要紧，耐搭俚哚说说闲话，（要勿）拨俚哚俗气熏坏仔耐。”君玉抵掌懊悔道：“故例划一，幸亏耐提醒仔我。”

蓬壶坐下，袖中取出一张新闻纸，道：“红豆词人送拨耐个诗，阿曾赏鉴过歇？”君王道：“勿曾呀，让我看囗。”蓬壶揭开新闻纸，指与君玉看了。君玉道：“俚来浪说啥？讲拨我听囗。”蓬壶带上眼镜，将那诗朗念一遍，再演解一遍，君王大喜。

蓬壶道：“耐该应和俚两首送拨俚，我替耐改。题目末就叫‘答红豆词人即用原韵’九个字，阿是蛮好？”君王道：“七律当中四句，我做勿来，耐替我代做仔罢。”蓬壶道：“故末生活哉！明朝倪海上吟坛正日，陆里有工夫？”君王道：“谢谢耐，随便啥做点末哉。”蓬壶正色道：“耐啥个闲话嗄！做诗是正经大事体，阿好随便啥做点！”君王连忙谢过。蓬壶又道：“不过我替耐做倒要写意点，忒啥个惨淡经营，就匆像耐做个诗，俚哚也匆相信哉。”君王亦以为然。于是蓬壶独自一个闭目摇头，口中不住的“呜呜”作声；忽然举起一只指头，向大理石桌子上戳了几戳，划了几划，攒眉道：“俚用个韵倒勿容易押，一歇倒做勿出，等我带转去做两句出色个拨耐。”君玉道：“该搭用夜饭哉呀。”蓬壶道：“（要勿）哉。”君玉复嘱其须当秘密而别。

蓬壶踱出兆富里，一路上还自言自语的构思琢句，突然刺斜里冲出一个娘姨，一把抓住蓬壶臂膊，问：“方老爷陆里去？”蓬壶骇愕失措，挤眼注视，依稀认得是赵桂林的娘姨，桂林叫做“外婆”的。蓬壶便也胡乱叫声“外婆”。外婆道：“方老爷为啥倪搭勿来？去囗！”蓬壶道：“故歇无拨空，明朝来。”外婆道：“啥个明朝嗄！倪小姐牵记煞耐，请仔耐几埭哉，耐勿去！”不由分说，把蓬壶拉进同庆里，抄到尚仁里赵桂林家。

赵桂林迎进房间，叫声“方老爷”，道：“阿是倪怠慢仔耐，耐一埭也匆来？”蓬壶微笑坐下。外婆搭讪道：“方老爷就前节壶中天叫仔局下来末，勿曾来歇。两个多月哉，阿好意思？”桂林接嘴道：“拨个文君王迷昏哉呀，陆里想得着该搭来？”蓬壶慌的喝住，道：“耐（要勿）睛说！文君王是我女弟子，客客气气，耐去糟蹋俚，岂有此理！”桂林哼了一声无语。外婆一面装水烟，一面悄悄说道：“倪小姐生意，瞒勿过耐方老爷。前节方老爷来里照应，倒哝仔过去。故歇耐也匆来裁，连浪几日天，出局才无投。下头杨媛媛末碰和吃酒，闹猛得来。倪楼浪冰清水冷，阿要坍台！”蓬壶不等说完，就叉口道：“单是个碰和吃酒，俗气得势。我前回替桂林上仔新闻纸，天下十八省个人，陆里一个勿看见？才晓得上海有个赵桂林末。实概样式，比仔碰和吃酒，难说哚！”外婆顺他口气，复接说道：“难方老爷原像前回照应点俚罢。耐一样去做个文君王，就倪搭走走，啥勿好？吃两台酒，碰两场和，故是倪要巴结煞哉！”蓬壶道：“碰和吃酒末，啥稀奇嗄？等我过仔明朝，再去搭俚做两首诗末哉。”外婆道：“方老爷，耐末无啥稀奇，倪倒是碰和吃酒个好。耐辛辛苦苦做仔啥物事送拨俚，俚用勿着（口宛）！就匆是碰和吃酒末，有场花应酬，叫叫局，故也无啥。”蓬壶呵呵冷笑，连说：“俗气得势！”

外婆见蓬壶呆头呆脑，说不入港，望着赵桂林打了一句市俗泛语。桂林但点点头，蓬壶那里懂得？外婆水烟装毕，桂林即请蓬壶点菜，欲留便饭。蓬壶力辞不获，遂说不必叫菜，仅命买些熏腊之品。外婆传命外场买来，和自备饭菜一并搬上。

第五十九回终。